அலுவலகப் பணி

வணக்கங்கள் கோரும்

அதிகாரியின் அறையில்

கால்கள் தயங்கி தயங்கி நுழைகின்றன...!

கண்டுகொள்ளப்படாததால் உடல்குறுகி

எகத்தாளக் குரலால் தடுமாறுகிறேன்

அவசரத்தில் குறிப்பெடுத்து

அதற்க்குப்பின் விரித்தெழுத

கணிப்பொறியில் கைகள் ஊர்கின்றன...!

என்

கண்ணாடிக் கதவுகளை ஊடுருவும்

உளவுக்கண்கள் ஊசியாய் தைக்கின்றன..!

உணவு நேரத்தில்

செய்தித்தாள் புரட்டவும் தயங்குகிறேன்...!

என்னை அழைக்கும் தொலைபேசியில்

தயங்கி தயங்கி பேசுகிறேன்..!

தேடிவரும் நண்பரை

சிறுசிறு பதில்களோடு திருப்பி அனுப்புகிறேன்...!

சோர்வு சிதைந்தாலும்

கட்டளைக்குப் பணிகிறேன்...!

நாளை என்னும் வார்த்தையை

நாக்கு தயங்கும் சொல்ல...

எதேதோ வார்த்தைகளால்

தினந்தோறும் புண்படுகிறேன்...!

படியிறங்கி வெளியேறி வந்து

தரையில் நிற்கையில் பெரும் நிம்மதி

விடுதலை...!

கண்கூச ஊரும் வாகனங்களில்

கவனம் மாற்றிப் பதிக்கிறேன்...!

நாளை

மீண்டும் இங்கு திரும்ப…!

படங்கள் ; கூகுள் தேடல்

நண்பர்களே கவிதை பற்றிய தங்களது எண்ணங்களை கருத்துக்களாக பகிர்ந்துவிட்டுச் செல்லுங்கள்.

Tweet

Share