பாடை யாத்திரை

சிதறிய பட்டாசின்

காகித சதைகள் மீது

ஊர்வலக் கால்கள்.

மன விளிம்பில்

சப்பணமிட்டது சப்த சந்தோஷம்...!

தெருவின் தேய்மானங்களுக்கு

ஒத்தடம் கொடுத்தபடி

உதிரிப்பூக்கள்..!

அந்த நாள் போரை

அடையாளம் காட்டியது

அய்யனார் ஊதிய சங்கு..!

இழுத்துக் கட்டிய கன்றின் தோளில்

ஒழுகின பறையின் ஓசையில்

பரபரத்த கால்களின்

டப்பாங்குத்து ஆட்டத்தில்

பிரசன்னமானது

பிரபுதேவா டான்ஸ்...!

"கோய்ந்தா.... கோய்ந்தா"

இங்காவது இருப்பாரா

இப்படியும் ஓர் இறை தேடல்...

காணாமல் போன பிள்ளையை தேடும்

தாயாராய்...!

மரணத்தை சுமந்து செல்லும்

பிணத்தின் உதட்டிலும்

ஈக்களின் முத்தம்..!

எதைப் பற்றியும்

கவலையில்லை – கால்களின்

கட்டவிழ்ந்தால் போதும்...

பாடையில் தலைகீழாய் தொங்கியபடி

வரும் கோழியின் கதறல்...!

கதறல் இங்கே யாருக்கு கேட்கும்...?

படங்கள் ; கூகுள் தேடல்..

உறவுகளே எழுதிய கவிதை பிடித்திருந்தால் தங்களது எண்ணங்களை கருத்துக்களாக பகிர்ந்துவிட்டுச் செல்லுங்கள்.

Tweet

Share