அன்புள்ள முதல்வருக்கு ஆனந்தன் எழுதுவது...

அன்புள்ள முதல்வருக்கு ஆசை ஆசையாய் முதல் கடிதம் ! நான் நலம் தங்களின் நலம் அறிய ஆவல். தங்களின் கடந்த நான்கு மாத ஆட்சிப்பொறுப்புக்கும், இனி வரப்போகும் ஆட்சிக்கும், எங்களை வழிநடத்தும் தங்கள் அமைச்சரவை சகாக்கள் அனைவருக்கும் என் முதற்கண் முத்தான வணக்கங்கள்.இங்கே எனது விருப்பத்தை பதிவிட்டுள்ளேன்.படித்து பார்த்து தாங்கள் செயல்படுத்துங்கள்.

எந்த ஒரு மனிதனும், தான் கஷ்டப்பட்டு, உழைத்து சம்பாதித்து, அதன் மூலம் ஒரு பொருளை வாங்கினால், அதனுடைய மதிப்பே தனிதான். அதே பொருள் அவனுக்கு இலவசமாக கிடைக்கும் போது, அதன் மதிப்பை அறியமாட்டான். தவணை முறையில், ஒரு டிவி வாங்கினால், அதை தன் கண்ணாக பாவித்து, பாதுகாத்து பயன்படுத்துவான். அதே டிவி அரசாங்கத்தால் இலவசமாக கிடைத்தால், அதை துச்சமாக நினைப்பான்; இது கடந்த கால உண்மை.

இலவச டிவி கொடுத்தார்கள் என்ன நடந்தது? கள்ளச் சந்தையில் ஆயிரம் முதல் ஆயிரத்து ஐநூறுக்கு அடுத்தவருக்கு கைமாற்றப்பட்டுள்ளது.

மனசாட்சிப்படி பார்த்தால் டி.வி வாங்கிய எத்தனை பேர் தங்களது வீட்டில் அதை பயன்படுத்துகிறார்கள் என்பதை ஓர் கணக்கு போட்டுப் பாருங்களேன்.உண்மை புரிய வரும் உங்களுக்கு! கடந்த ஆட்சியில் வழங்கிய இலவசங்களுக்கு அளவே இல்லை. எனினும் தமிழக மகாஜனங்கள் இலவசங்கள் எங்களுக்குத் தேவையில்லையென்று, அவற்றை துச்சமென எண்ணி, ஆட்சிக்கே ஒரு முற்றுப்புள்ளி வைத்து, பாடம் புகட்டிவிட்டனர். தாங்கள் ஆட்சிக்கு வந்ததும், மீண்டும் இலவசங்கள் என அறிவித்து,அதனை வெற்றிகரமாக செயல்படுத்தியும் விட்டீர்கள் மிக்க நன்றி

 

ஆனால் தாங்கள் தரும்  இலவசங்கள், உண்மையில் வறுமைக்கோட்டிற்குக் கீழே இருப்பவர்களுக்குப் போய்ச் சேர்ந்து, பயன்பட்டால், அது நன்மையே.இருபது கிலோ அரிசி இலவசமாக வழங்குவது சாதாரண விஷயமா? அதை பெற்றுக்கொண்டு மதிப்பிற்குரிய மகாஜனங்கள் அப்படியே, "மாடி வீட்டு ஏழைகளுக்கு' கிலோ நான்கு அல்லது ஐந்து ரூபாய்க்கு விற்றுவிடுகின்றனர். நாற்பது ரூபாய் கொடுத்து, ஒரு கிலோ அரிசி வாங்குபவர்களுக்கு, நான்கு ரூபாய்க்கு கிடைக்கும் போது  வேட்டை தான்.இச்சூழலில்  கிரைண்டர், மிக்சி, மின்விசிறி, ஏன் லேப்டாப்பும் இலவசமாக வழங்கப்பட உள்ளது.

ஆகவே தாங்கள் தரும் இலவசங்கள் அனைத்தும் வழிதவறி மாடிவீட்டு மகாஜனங்களுக்கு செல்வதை எப்படியேனும் இரும்புக்கரம் கொண்டு தடுத்து நிறுத்த முடிவெடுங்கள் அல்லது பசித்தவனுக்கு மீன்களைக் கொடுத்து உதவுவதைக் காட்டிலும், எப்படி மீன் பிடிப்பது  என்பதைகற்றுக் கொடுக்க நடவடிக்கை எடுத்தாலும் நலமே !

நன்றி !

டிஸ்கி


1.ஆனந்தன் : கடந்த தேர்தலில் ஜனநாயக கடமை தவறாமல் வாக்களித்த மகாஜனத்தில் ஒருவன்.

2.கடந்த ஆட்சியில் ஓர் ஆனந்தி கடிதம் எழுதினார் எழுதிய கடிதம் அந்த முதல்வரை சென்றடைந்தது.

நண்பர்களே! கடிதம் பிடித்திருந்தால் படித்துவிட்டு மறக்காமல் வாக்களித்து கருத்துக்களையும் பகிர்ந்து விட்டுச் செல்லுங்கள்..அதுவே முதல்வரிடம் கொண்டு சேர்க்கும் எளிய வழி !

Tweet

Share